Vilhjálmur er með bein í nefinu

Vilhjálmur mun standa uppi sem sigurvegari í þessu leiðindamáli. Hann gerði það í síðasta útspili sínu og sanniði til - hann getur gert það aftur.

Sendið honum baráttukveðjur og hlýjar hugsanir!

Pólitísk staða Vilhjálms rædd

Femínistarnir...

...hljóta núna að finna einhverja leið til að blása ráðstefnuna af. Er það ekki vaninn?

Vangaveltur um netmarkað

Vilhjálmur heldur velli!

Mikið lifandi skelfingar ósköp er ég stoltur af honum Vilhjálmi. Hann er heldur betur búinn að standa af sér eitt stærsta pólitíska slagviðri í manna minnum. Ekki aðeins reis hann aftur úr öskustónni og kemur tvíefldur til leiks í borgarstjórn, heldur kveður hann núna fréttamenn í kútinn með þessu nýjasta útspili sínu. Vilhjálmur á enn mikið inni!

 

Yfirlýsing frá Vilhjálmi Þ. Vilhjálmssyni

Hvers vegna var það ekki gert í gær?

Ég hef áður tjáð mig um ráðaleysi viðbragðsaðila við veðurofsanum í gær. Nú spyr ég: hvers vegna voru aðgerðir ekki samræmdar strax í gær, þegar verstu hryðjurnar riðu yfir og umferðin var öll úr skorðum?

Stundum finnst manni hreinlega eins og maður gæti sjálfur gert mun betur en þeir sem kallast eiga "fagaðilar".

Virkja á Samhæfingarmiðstöðina

Ábyrgðarlaus orð Sigurðar Kára

Ekki skil ég hvað mönnum gengur til með að láta svona út úr sér. EINU afskipti ríkisins af þegnunum sem hægt er að réttlæta með nokkrum hætti eru nákvæmlega þessi; að hindra að brennivín flæði um og yfir allt. Áfengi hefur eyðilagt líf fjölda fólks. Það er staðreynd.

Mér finnst hreinlega allt í lagi þótt aðgengi að áfengi á markaði sæti takmörkunum, svona rétt eins og byssueign - þótt ekki sé um nákvæmlega sömu hlutina að ræða.

Í reynslusölu í Reykjavík: Sunnlenski bjórinn ekki til á Suðurlandi

Búum við á landnámsöld?

Hvers vegna ætli sé ekki hægt að halda þessari leið opinni? Maður hefði haldið að Vegagerðin og aðrir viðbragðsaðilar væru öllum tækjum búnir til þess að geta haldið 40 kílómetra löngum vegarspotta tiltölulega snjóléttum - svona allavega rétt yfir mesta umferðartímann! Þarf fólk þá bara að gista á Hótel Örk fram á morgun?

Þetta finnst mér ekkert sérlega öflugar aðfarir hjá vegheflurum og öðrum sem koma við sögu.

Ætla yfir þrátt fyrir lokun

Þetta...

...er það sem ég hef alltaf sagt. Bull og kellingabækur að símar geti valdið heilaæxlum. Hvernig DATT fólki það í hug til að byrja með?

Frænka mín vinnur hjá rafvöruverslun hér í bæ og notar farsímann sinn mikið, auk þess sem hún hefur lesið mikið um ýmsar gerðir farsíma. Aldrei hefur hún orðið vör við eða heyrt af neinum sem fengið hefur krabbamein í höfuð sökum símnotkunar.

Hvað segir það manni?

Engin tengsl milli farsímanotkunar og heilaæxla

Skinhelgur heilbrigðisráðherra

Hvers vegna í ósköpunum ættu Alþingismenn ekki að fá að njóta sömu mannréttinda og aðrir landsmenn?

Nú eru reykingar ekki ólöglegar og reykherbergi ekki heldur. Hvernig er hægt að segja það til marks um góða starfshætti að gera þingmönnum lífið leitt?

 Aukinheldur: nú veit ég að Guðlaugur Þór er yndislegur maður og ákaflega heilsteyptur persónuleiki, en að tala um mál sem þetta á Alþingi Íslendinga virðist fremur vera tilraun heilbrigðisráðherra til þess að vekja athygli á sjálfum sér, frekar en góðum málstað. Hafa þingmenn ekkert þarfara að gera? Er þetta ekki frekar eitthvað sem á að ræða á göngunum í stað þess að vekja máls á þessu uppi í pontu?

 

Vill láta loka reykherbergi á Alþingi

Lélegir karakterar

Það er fljótt að sjást á fólki hvernig það kemur til með að verða þegar það vex úr grasi. Oft þarf ekki nema örfáa til að eyðileggja fyrir fjölda manns. Annars hef ég áður tjáð mig um þennan sið að ganga milli búða og sníkja nammi.

Hér sannast það kannski best að það kann ekki góðri lukku að stýra að hrúga ótal börnum saman í verslanamiðstöð og dæla í þau sykri. Sykur hefur ekki beinlínis róandi áhrif á barnssálirnar.

Skrílslæti í Kringlunni

Eru viðbragðsaðilar að bregðast fólki?

Vegurinn til og frá Reykjavík til austurs er sum sé lokaður. Enginn kemst úr borginni nema hann ætli norður eða vestur. Höfuðborginni. Nú er ég að velta einu fyrir mér. Fjöldinn allur af viðbragðsaðilum er til taks í neyðartilfellum sem þessum:

1. Vegagerðin.

2. Bæjarstarfsmenn

3. Hjálparsveitirnar.

4. Slökkviliðið

5. Lögreglan.

Allir þessir aðilar ættu að geta látið til sín taka þegar almennir borgarar þurfa á hjálp að halda. Þegar aðkoman að sjálfri höfuðborginni er hreinlega lokuð, hvers vegna gerir enginn neitt? Er það ekki nægileg röskun á samgöngum og lífi fólks að vera strandað í bænum og komast hvergi? Eða að vera strandað í Hveragerði og komast ekki heim til sín? Nú spyr ég náttúrlega eins og versti karlfauskur, en í hvað eru skattpeningarnir eiginlega að fara?

(Þessi færsla birtist við aðra frétt sem virðist hafa dottið út á sama tíma og ég skrifaði hana. Biðst velvirðingar á tvítekningunni.)

Ófærð víða um land